മലയാളി മനസ്സുകളിൽ ‘കിരീടം’ എന്ന എക്കാലത്തെയും സൂപ്പർ ഹിറ്റ് സിനിമയിലെ ‘കീരിക്കാടൻ ജോസ്’ എന്ന കഥാപാത്രത്തിലൂടെ ഇടം നേടിയ നടൻ മോഹൻരാജ് അന്തരിച്ചു. പാർക്കിൻസൺസ് രോഗബാധിതനായ അദ്ദേഹം ഏറെ നാളുകളായി ചികിത്സയിലായിരുന്നു. തിരുവനന്തപുരത്തുള്ള കാഞ്ഞിരംകുളത്തെ വീട്ടിൽ വെച്ചായിരുന്നു അന്ത്യം. എൺപതോളം സിനിമകളിൽ ഇദ്ദേഹം അഭിനയിച്ചിട്ടുണ്ട്. 2022- ൽ മമ്മൂട്ടി നായകനായി എത്തിയ റോഷാക്ക് എന്ന ചിത്രത്തിലാണ് ഒടുവിൽ അഭിനയിച്ചത്.
1986- ൽ ‘മൂന്നാം മുറ’ എന്ന ചിത്രത്തിലൂടെ മലയാള സിനിമയിലേക്ക് അരങ്ങേറ്റം കുറിച്ച മോഹൻരാജ് മലയാള സിനിമയിലും പ്രേക്ഷകർക്കിടയിലും അറിയപ്പെടുന്നത് മോഹൻലാൽ നായകനായി എത്തിയ കിരീടത്തിലെ കീരിക്കാടൻ ജോസ് എന്ന കഥാപാത്രത്തിലൂടെയാണ്. നിരവധി സിനിമകളിലും ഇദ്ദേഹം വില്ലൻ വേഷങ്ങളിലൂടെയാണ് വെള്ളിത്തിരയിൽ എത്തിയത്. അർത്ഥം, ഉപ്പുകണ്ടം ബ്രദേഴ്സ്, നരൻ, മായാവി, ആറാം തമ്പുരാൻ, വ്യൂഹം, ചെങ്കോൽ, വാഴുന്നോർ, കാസറഗോഡ് കാദർഭായ്, നരസിംഹം, പത്രം, മറുപുറം, പുറപ്പാട്, രാജവാഴ്ച, ചിറകൊടിഞ്ഞ കിനാക്കൾ, റോഷാക്ക് തുടങ്ങി ശ്രദ്ധേയ സിനിമകളിൽ മികച്ച കഥാപാത്രങ്ങളെ കൈകാര്യം ചെയ്തു. കോഴിക്കോട് അസിസ്റ്റന്റ് എൻഫോഴ്സ്മെന്റ് ഓഫീസറായി ജോലി ചെയ്തു. ഭാര്യ: ഉഷ.
