ഓണക്കാലത്ത് തിയ്യേറ്ററുകളിലെത്തി പ്രേക്ഷക ശ്രദ്ധ നേടിയ ആര്‍ ഡി എക്സിന് ശേഷം ആന്‍റണി വര്‍ഗീസും നിര്‍മാതാവ് സോഫിയ പോളും ഒന്നിക്കുന്ന പുതിയ ചിത്രത്തിന് ശനിയാഴ്ച കൊച്ചിയില്‍ വെച്ചു തുടക്കമായി. ഇടപ്പള്ളിയിലെ അഞ്ചുമന ദേവീക്ഷേത്രത്തില്‍ വെച്ച് ചിത്രത്തിന്‍റെ പൂജ ചടങ്ങുകള്‍ നടന്നു. സോഫിയ പോള്‍, സുപ്രിയമേനോന്‍, ആന്‍റണി വര്‍ഗീസ് തുടങ്ങിയയവര്‍ ദീപം തെളിയിച്ചു. പോള്‍ ജയിംസ് സ്വിച്ചോണ്‍ കര്‍മ്മവും ഡെസിന്‍ പോള്‍ ഫസ്റ്റ് ക്ലാപ്പും നല്കി. ആര്‍ ഡി എക്സിന്‍റെ സംവിധായകന്‍ നഹാസ് ഹിദായത്ത്, അലക്സ് ജെ പുളിക്കല്‍, അനശ്വര രാജന്‍, തുടങ്ങിയവര്‍ ചടങ്ങില്‍ പങ്കെടുത്തു.
നവാഗതനായ അജിത്ത് മാമ്പിള്ളി സംവിധാനം ചെയ്യുന്ന ചിത്രം വീക്കെന്‍റ് ബ്ലോക് ബസ്റ്റര്‍സിന്‍റെ ബാനറില്‍ സോഫിയ പോള്‍ നിര്‍മ്മിക്കുന്നു. പ്രമുഖ താരങ്ങള്‍ അണിനിരക്കുന്ന ചിത്രം കടല്‍ പശ്ചാത്തലത്തിലുള്ള ഒരു റിവഞ്ച് ആക്ഷന്‍ ഡ്രാമയാണ്. തമിഴ് സംവിധായകനായ എസ് ആര്‍ പ്രഭാകരന്‍, സലീല്‍- രഞ്ജിത്, ഫാന്‍റം പ്രവീണ്‍, പ്രാശോഭ് വിജയന്‍ തുടങ്ങിയവര്‍ക്കൊപ്പം സഹസംവിധായകനായി പ്രവര്‍ത്തിച്ചിട്ടുണ്ട്. ചിത്രത്തിന് തിരക്കഥ സതീഷ് തോന്നക്കല്‍, റോയലിന്‍ റോബര്‍ട്ട്, അജിത്ത് മാമ്പിള്ളി തുടങ്ങിയവര്‍ നിര്‍വഹിക്കുന്നു. സംഗീതവും പശ്ചാത്തലവും സാം സി എസ്, ഛായാഗ്രഹണം ജിതിന്‍ സ്റ്റാന്‍ സിലോസിസ്.
