ലോകമെമ്പാടും ഉറ്റുനോക്കുന്ന 77- മത് കാൻഅന്താരാഷ്ട്ര ചലച്ചിത്രവേദിയിൽ തിളങ്ങി ഇന്ത്യൻ സിനിമ. ഗ്രാന്റ് പ്രീ പുരസ്കാരം നേടുന്ന ആദ്യ ഇന്ത്യൻ സിനിമയായി പായൽ കപാഡിയ സംവിധാനം ചെയ്ത ‘ഓൾ വി ഇമാജിൻ ആസ് ലൈറ്റ്’ എന്ന ചിത്രത്തിന് ലഭിച്ചു. ഇന്ത്യൻ സിനിമയുടെ അഭിമാനത്തിന് പൊൻതൂവൽ ചാർത്തിയിരിക്കുകയാണ് പായൽ കപാഡിയയും അഭിനേതാക്കളും. ആദ്യമായി ഈ പുരസ്കാരം നേടുന്ന ഇന്ത്യൻ സംവിധായിക കൂടിയാണ് പായൽ കപാഡിയ. ചിത്രത്തിൽ പ്രധാനകഥാപാത്രങ്ങളായി അഭിനയിച്ചിരിക്കുന്നത് കനി കുസൃതിയും ദിവ്യപ്രഭയുമാണ്. അസീസ് നെടുമങ്ങാട് ആണ് ചിത്രത്തിലെ മറ്റൊരുപ്രധാനകഥാപാത്രത്തെ അവതരിപ്പിച്ചത്. കാൻ ചലച്ചിത്രവേദിയിൽ പ്രദർശിപ്പിച്ച സിനിമയ്ക്ക് വലിയ സ്വീകരണവും മികച്ച നിരൂപക പ്രശംസയുമാണ് ലഭിച്ചത്.
മുംബൈ നഗരത്തിൽ ജീവിക്കുന്ന രണ്ട് നേഴ്സ്മാരുടെ ജീവിതകഥപറയുന്ന ചിത്രമാണ് ‘ഓൾ വി ഇമാജിൻ ആസ് ലൈറ്റ്’. ചിത്രത്തിൽ കനി കുസൃതി പ്രഭ, ദിവ്യപ്രഭ അനു എന്നീ കഥാപാത്രങ്ങളായി അഭിനയിച്ചു. ചിത്രത്തിന്റെ തിരക്കഥയും പായൽ കപാഡിയയുടെ ആണ്. ‘ബാർബി’ എന്ന സിനിമയുടെ സംവിധായിക ഗ്രെറ്റ ഗെർവിഗ് അദ്ധ്യക്ഷയായ ജൂറിയാണ് മത്സരത്തിനെത്തിയ ഓരോ സിനിമകളെയും വിലയിരുത്തിയത്. ഫിലിം ആൻഡ് ടെലിവിഷൻ ഇൻസ്റ്റി റ്റ്യൂട്ട് ഓഫ് ഇന്ത്യയിലെ പൂർവവിദ്യാർഥിനിയാണ് പായൽ കപാഡിയ. മുൻപ് സംവിധാനം ചെയ്ത ‘എ നൈറ്റ് ഓഫ് നോയിങ് നത്തിങ്’ എന്ന ചിത്രത്തിന് 2021 – ൽ കാൻ ചലച്ചിത്രമേളയിൽ വെച്ച് ഗോൾഡൻ ഐ പുരസ്കാരം ലഭിച്ചിരുന്നു. ഇന്ത്യയിലെ ആദ്യ വീഡിയോ ആർട്ടിസ്റ്റുകളിൽ ഒരാളായ നളിനി മാലനിയുടെ മകളാണ് പായൽ കപാഡിയ. ഫ്രഞ്ച് കമ്പനിയായ പെറ്റിറ്റ് കെയൊസും ഇന്ത്യൻ കമ്പനിയായ ചോക്ക് ആൻഡ് ചീസും അനദർ ബെർത്തൂം ചേർന്നാണ് നിർമ്മിച്ചത്. കനി കുസൃതി, ദിവ്യപ്രഭ, ഹൃദ്ദു ഹാറൂൺ, സീക്കൊ മൈത്രാ, തോമസ് ഹക്കീം, ഛായ ഖദം, റൺബീർ ദാസ്, ജൂലിയൻ ഗ്രാഫ്, എന്നിവരും കാനിൽ ഇവർക്കൊപ്പം എത്തിയിരുന്നു.
