ഗന്ധര്‍വ്വ വേഷത്തില്‍ ഇനി ഉണ്ണി മുകുന്ദന്‍ പ്രേക്ഷകര്‍ക്ക് മുന്നിലേക്ക്. കൊച്ചിയില്‍ പുതിയ ചിത്രത്തിന്റെ പൂജ നടന്നു. നാല്‍പതു കോടിയാണ് ചിത്രത്തിന് ബജറ്റ്. വിഷ്ണു അരവിന്ദാണ് സ്വതന്ത്ര സംവിധായകാനായി ഗന്ധര്‍വ്വൻ ജൂനിയറില്‍ എത്തുന്നത്. കല്‍ക്കി, സെക്കന്‍റ് ഷോ ,തുടങ്ങിയ ചിത്രങ്ങളിൽ സഹസംവിധായകനായിരുന്നു വിഷ്ണു അരവിന്ദ്. കല്‍ക്കിക്ക് വേണ്ടി തിരക്കഥ ഒരുക്കിയിട്ടുള്ള സുജിന്‍ സുജാതനും പ്രവീണ്‍ പ്രഭാറാമും ചേര്‍ന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്.
ഒരേസമയം ഭ്രമാത്മകവും നര്‍മ്മപ്രധാനവുമാണ് ഗന്ധര്‍വ്വന്‍ ജൂനിയര്‍. ഭൂമിയിലേക്ക് അപ്രതീക്ഷിതമായി എത്തുന്ന ഗന്ധര്‍വ്വന്‍റെ നെഗറ്റീവും പോസറ്റീവുമായ സംഭവങ്ങളെ രസകരമായി കോര്‍ത്തിണക്കിയിരിക്കുന്നു. എഡിറ്റിങ് അപ്പു ഭട്ടതിരിയും ഛായാഗ്രഹണം സെല്‍വരാജും സംഗീതം ജേക്സ് ബിജോയിയും നിര്‍വഹിച്ചിരിക്കുന്നു. ലിറ്റില്‍ ബിഗ് ഫിലിംസിന്റെ ബാനറില്‍ പ്രശോഭ് കൃഷ്ണയും സുവിന്‍ കെ വര്‍ക്കിയും ചേര്‍ന്നാണ് നിര്‍മ്മിച്ചിരിക്കുന്നത്.
