തമിഴ് നടനും സംവിധായകനുമായ ജി മാരിമുത്തു അന്തരിച്ചു. 58- വയസ്സായിരുന്നു. ഹൃദയാഘാതമായിരുന്നു മരണ കാരണം. ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. ‘എതിര്‍നീച്ചല്‍’ എന്ന ടെലിവിഷന്‍ സീരിയലിന്‍റെ ഡബ്ബിങ് നടന്നുകൊണ്ടിരിക്കവേ കുഴഞ്ഞ് വീഴുകയായിരുന്നു. രജനികാന്ത് നായകനായി എത്തിയ ജയിലര്‍ എന്ന ചിത്രത്തിലാണ് അവസാനമായി പ്രവര്‍ത്തിച്ചത്. രണ്ടു പതിറ്റാണ്ടിലേറെ കാലമായി സിനിമയിലും ടെലിവിഷനിലും ജോലി ചെയ്തു. സംവിധായകനും സഹസംവിധായകനും അഭിനേതാവുമായി ജോലി നോക്കി.
സിനിമ സ്വപ്നം കണ്ടുകൊണ്ട് 1990- ല്‍ തേനിയില്‍ നിന്നും ചെന്നൈ എത്തിയ മാരിമുത്തു ഒരു ഹോട്ടലില്‍ കുറെകാലമായി ജോലി ചെയ്തു. കവിയും ഗാനരചയിതാവുമായ വൈരമുത്തുവിനെ പരിചയപ്പെട്ടത് ഒരു വഴിത്തിരിവായി. 1993- ല്‍ രാജ് കിരണ്‍ സംവിധാനം ചെയ്ത അരമനൈ കിള്ളി എന്ന ചിത്രത്തിലും 1995- ല്‍ എല്ലാമെ എന്‍ രാസത്തന്‍ എന്നീ ചിത്രങ്ങളിലും സഹായിയായി നിന്നു. പിന്നീട് മണിരത്നം, എസ് ജെ സൂര്യ, സീമന്‍, വസന്ത് തുടങ്ങിയവരുടെ കൂടെയും പ്രവര്‍ത്തിച്ചു.
വാലി എന്ന ചിത്രത്തിലൂടെ 1999- ല്‍ ആദ്യമായി അഭിനയ ജീവിതത്തിനു തുടക്കം കുറിച്ചു. പിന്നീട് ഉദയ, കണ്ണും കണ്ണും, യുദ്ധം സെയ് എന്നീ ചിത്രങ്ങളില്‍ ശ്രദ്ധേയ വേഷങ്ങള്‍ കൈകാര്യം ചെയ്തു. യുദ്ധം സെയ് എന്ന ചിത്രത്തിലെ പോളി ഉദ്യോഗസ്ഥന്‍റെ വേഷം ഏറെ സ്രാധിക്കപ്പെട്ടത്തോട് കൂടി നിരാവധി കഥാപാത്രങ്ങള്‍ മാരിമുത്തുവിനെ തേടിയെത്താന്‍ തുടങ്ങി. ആരോഹണം, നിമിന്‍ന്തുനില്‍, കൊമ്പന്‍ തുടങ്ങിയ ചിത്രങ്ങളിലും പോലീസ് വേഷത്തില്‍ എത്തി. ആദ്യമായി സ്വതന്ത്ര്യ സംവിധായകനായി എത്തിയ കണ്ണും കണ്ണും എന്ന ചിത്രത്തില്‍ അഭിനയിക്കുകയും ചെയ്തിട്ടുണ്ട്. പുലിവാല്‍ എന്ന ചിത്രമാണ് 2014- ല്‍ അവസാനമായി സംവിധാനം ചെയ്യുന്നത്.
മമ്മൂട്ടി നായകനായി എത്തിയ 2020- ലെ ഷൈലോക്ക് എന്ന ചിത്രത്തിലൂടെ മാരിമുത്തു മലയാളത്തിലും അഭിനയത്തിനു തുടക്കം കുറിച്ചു. 2021- ധനുഷിനും അക്ഷയ് കുമാറിനുമൊപ്പം ഹിന്ദി ചിത്രം അത്രന്‍ഗി രേയില്‍ അഭിനയിച്ചു. അരുവ സണ്ട, ഭൂമി, സുല്‍ത്താന്‍, കൊടി, ഭൈരവ, രുദ്ര താണ്ഡവം, ലാഭം, പരിയേറും പെരുമാള്‍, വിക്രം, ശിവരഞ്ജിനിയും ഇന്നും സില പെണ്‍കളും, കാര്‍ബണ്‍, മഗളിര്‍ മട്ടും, തീരെ കാതല്‍, കണ്ണൈ നമ്പാതെ എന്നീ ചിത്രങ്ങളില്‍ പ്രവര്‍ത്തിച്ചു. കമല്‍ഹാസന്‍ നായകനായി എത്തുന്ന ഇന്ത്യന്‍ 2 ല്‍ അഭിനയിച്ചു കൊണ്ടിരിക്കുകയായിരുന്നു. സിനിമകളില്‍ സജീവമായി നില്ക്കുമ്പോഴായിരുന്നു അപ്രതീക്ഷിത വിയോഗം. ഭാര്യ: ഭാഗ്യലക്ഷ്മി.
