സിനിമ- സീരിയൽ സംവിധായകനും തിരക്കഥാകൃത്തുമായ ബിജു വട്ടപ്പാറ കുഴഞ്ഞുവീണു മരിച്ചു. 54- വയസ്സായിരുന്നു. മൂവാറ്റുപുഴയിൽ ഒരു കേസുമായി ബന്ധപ്പെട്ട വിഷയത്തിൽ അഭിഭാഷകനെ കാണാൻ എത്തിയപ്പോഴായിരുന്നു കുഴഞ്ഞു വീണത്. ഉടനെ ആശുപത്രിയിൽ എത്തിച്ചെങ്കിലും രക്ഷിക്കാൻ കഴിഞ്ഞില്ല. സുരേഷ് ഗോപി നായകനായി എത്തിയ രാമരാവണൻ, സ്വന്തം ഭാര്യ സിന്ദാബാദ് തുടങ്ങിയ സിനിമകളുടെ സംവിധായകനാണ്. കലാഭവൻ നായകനായ ലോകനാഥൻ ഐ എ എസ്, കളഭം എന്നീ ഹിറ്റ് സിനിമകൾക്ക് വേണ്ടി തിരക്കഥകൾ എഴുതി.
വെളുത്ത കത്രീന, ചക്കരവാവ, ശംഖുപുഷ്പം എന്നീ നോവലുകൾ എഴുതി. ഈ നോവലുകളെല്ലാം പിന്നീട് സീരിയലുകളും ആയിട്ടുണ്ട്. ഇടവഴിയും തുമ്പപ്പൂവും എന്ന കവിതാസമാഹാരത്തിന് കടവനാട് കുട്ടികൃഷ്ണൻ പുരസ്കാരം ലഭിച്ചു. കേരള ഗ്രന്ഥശാല സംഘം സംസ്ഥാന കൌൺസിൽ അംഗം കൂടിയായിരുന്നു അദ്ദേഹം. ഫിലിം ക്രിട്ടിക്സ് അവാർഡ് ലഭിച്ചിട്ടുണ്ട്. മൃതദേഹം താലൂക്ക് ആശുപത്രിയിൽ സൂക്ഷിച്ചിരിക്കുകയാണ്. ഒക്കൽ വട്ടപ്പാറ വീട്ടിൽ രവിയുടെ മകനാണ്. മകൾ: ദേവനന്ദന.
