മലയാളികളെ കുടുകുടാ ചിരിപ്പിക്കുകയും ചിന്തിപ്പിക്കുകയും ചെയ്ത ഹിറ്റ് ചിത്രം ആക്ഷന്‍ ഹീറോ ബിജുവിന്‍റെ രണ്ടാം ഭാഗം വരുന്നു. ആദ്യ ചിത്രത്തിന്‍റെ കൂട്ടുകെട്ടാണ് രണ്ടാംഭാഗത്തും ഉള്ളത്. എബ്രിഡ് ഷൈന്‍ സംവിധാനം ചെയ്ത ആക്ഷന്‍ ഹീറോ പുറത്തിറങ്ങിയത് 2016- ലാണ്. നിവിന്‍പോളി നായകനായ ചിത്രത്തില്‍ പോലീസ് കഥപറയുന്ന കോമഡി എന്‍റര്‍ടൈമെന്‍റ് ചിത്രമായിരുന്നു അത്. പതിവ് പോലീസ് കഥകളില്‍ നിന്നെല്ലാം വ്യത്യസ്തമായിരുന്നു ആക്ഷന്‍ ഹീറോ ബിജു.
ആക്ഷന്‍ ഹീറോ ബിജുവിന്‍റെ ഓഡിഷന്‍ കഴിഞ്ഞ് പ്രീപ്രൊഡക്ഷന്‍ ആരംഭിച്ചിരിക്കുകയാണ് ഇപ്പോള്‍. ആക്ഷന്‍ ഹീറോ ബിജുവിലെ ഓരോ സീനുകളും രസകരമായിരുന്നു. പോളിജൂനിയര്‍ പിക്ചേഴ്സ് നിര്‍മ്മിക്കുന്ന രസകരമായ മറ്റൊരു ദൃശ്യവിരുന്നൊരുക്കുവാന്‍ തയ്യാറാവുകയാണ് ചിത്രത്തിന്‍റെ അണിയറപ്രവര്‍ത്തകര്‍. ആദ്യ ചിത്രത്തിലെ ഗാനങ്ങളും ഏറെ ജനപ്രിയത നേടിയിരുന്നു. ജെറി അമല്‍ദേവ് ആയിരുന്നു സംഗീതം നിര്‍വഹിച്ചത്. അനു ഇമ്മാനുവല്‍ നായികയായി എത്തിയ ചിത്രത്തില്‍ ജോജു ജോര്‍ജ്ജ്, അരിസ്റ്റോ സുരേഷ്, രോഹിണി, മേഘ നാഥന്‍, വിന്ദുജാ മേനോന്‍ തുടങ്ങിയവര്‍ ആയിരുന്നു പ്രധാന വേഷത്തില്‍ എത്തിയത്.
