ആനക്കള്ളന്‍, പഞ്ചവര്‍ണ്ണതത്ത, ആനന്ദം പരമാനന്ദം എന്നീ ചിത്രങ്ങള്‍ക്ക് ശേഷം സപ്ത തരംഗ്- ക്രിയേഷന്‍സ് നിര്‍മ്മിച്ച് ഷാനവാസ് കെ ബാവക്കുട്ടി സംവിധാനം ചെയ്യുന്ന പുതിയ ചിത്രത്തിന്റെ ഷൂട്ടിംഗ് ആരംഭിച്ചു. ചിങ്ങം ഒന്നിന് കൊച്ചിയിലെ പുത്തന്‍കുരിശ് ചെന്‍റോസ് ഇവന്‍റ്സ് സെന്‍ററില്‍ ചടങ്ങുകള്‍ നടന്നു. റൊമാന്റിക് കോമഡി ത്രില്ലര്‍ ചിത്രത്തില്‍ മെട്രോനഗരത്തില്‍ ജീവിക്കുന്ന മൂന്നുപേരുടെ പ്രണയകഥയാണ് പറയുന്നത്.
സപ്ത തരംഗിന്‍റെ അണിയറ പ്രവര്‍ത്തകരായ ഒ പി ഉണ്ണികൃഷ്ണന്‍, മധു പള്ളിയന, ജയഗോപാലന്‍, ഷാനവാസ് കെ ബാവക്കുട്ടി, ജേക്കബ് വി തോമസ് വള്ളക്കാലില്‍, സുമ ജേക്കബ് വള്ളക്കാലില്‍ പൂര്‍ണ്ണിമ ഇന്ദ്രജിത്ത്, പ്രിയംവദ, ഹക്കിം ഷാ തുടങ്ങിയവരും ഭദ്രദീപം കൊളുത്തി. സുബ്രഹ്മണ്യന്‍ സ്വിച്ചോണ്‍ കര്‍മ്മവും സന്തോഷ് വള്ളക്കാല്‍ ഫസ്റ്റ് ക്ലാപ്പും നല്കി.
വിജയരാഘവന്‍, ജാഫര്‍ ഇടുക്കി, ഷമ്മി തിലകന്‍, ഗണപതി, ഉണ്ണിരാജ, അസീസ് നെടുമങ്ങാട്, മനോഹരി ജോയ്, ശ്രുതി രാമചന്ദ്രന്‍, തുടങ്ങിയവരാണ് ചിത്രത്തിലെ മറ്റ് പ്രധാന കഥാപാത്രങ്ങളായി എത്തുന്നത്. തിരക്കഥയും ഗാനരചനയും രഘുനാഥ് പാലേരിയുംടേതാണ്. സംഗീതം ഹിഷാം അബ്ദുല്‍ വഹാബും ഛായാഗ്രഹണം എല്‍ദോസ് നിരപ്പേലും എഡിറ്റിങ് മനോജ് സി എസും നിര്‍വഹിക്കുന്നു. പൂക്കാട്ടുപടി, കാക്കനാട്, കരിമുകള്‍, പുത്തന്‍കുരിശ്, എന്നിവിടങ്ങളിലാണ് ചിത്രീകരണം.
